Иҗтимагый совет полиция эшен тикшерде
Ел саен үткәрелә торган "Гражданнар мониторингы" акциясе кысаларында Россия Эчке эшләр министрлыгының Яшел Үзән районы буенча бүлеге каршындагы Иҗтимагый совет әгъзалары Наталья Тутаева, Илсөя Завилейская рәис Эдуард Донченко җитәкчелегендә кизү частена, полициянең махсуслаштырылган учреждениеләренә - административ кулга алынучылар өчен махсус кабул итү һәм вакытлыча тоту изоляторына бардылар. Соңгыларының максаты шунда булган гражданнарның яшәү шартлары белән танышудан гыйбарәт иде.
Полиция начальнигы урынбасары Роман Кудрявцев белән дежур часть эше белән таныштылар. Бүлекчә башлыгы Михаил Бандорин биналарның техник җиһазланышы, дежур сменаларның эшен оештыру турында сөйләде, җәмәгатьчеләр оператив дежурныйның эшен күзәтә алдылар.
Тоткарланган затлар өчен махсус бүлмәләр, вакытлыча тоту изоляторы һәм махсус кабул итү бүлмәсе тикшерелде, анда Иҗтимагый совет вәкилләре шикләнелүчеләрне һәм гаепләнүчеләрне тоту камераларын карадылар, хезмәт итүче хезмәткәрләр белән әңгәмә кордылар. Моннан тыш, җәмәгатьчеләр тоткарланучылар белән аралашты, полиция хезмәткәрләренең законсыз гамәлләренә карата шикаятьләр булмады.
Наталья Тутаева билгеләп үткәнчә, тоткарланучылар яхшы шартларда яши, барлык санитар нормалар үтәлә, кирәкле медикаментлар бар, җитәрлек һәм баланслы туклану белән тәэмин ителәләр.
Тикшерү ахырында дүрт аяклы дусларыбыз янына бардылар. Полиция кинологы кинология хезмәтенең эш үзенчәлекләре, нинди токымлы этләр кулланылуы, өйрәтүләрнең ничек узуы турында сөйләде.
Иҗтимагый совет вәкилләре аларга хезмәтләренә намуслы караулары өчен рәхмәт белдерделәр һәм уңышлар теләделәр.
Россия Эчке эшләр министрлыгының Яшел Үзән районы буенча бүлеге матбугат хезмәте