Мидхәт Шаһиәхмәтов: Татарстан Республикасының барлык районнарында икътисадны тотрыклы үстерү буенча оперштаблар булдырылган

Татарстанның барлык муниципаль берәмлекләрендә һәм тармак министрлыкларында икътисадны тотрыклы үстерү өчен оператив штаблар булдырылды, дип хәбәр итте журналистларга ТР икътисад министры Мидхәт Шаһиәхмәтов. Шулай итеп, ТР Президенты Рөстәм Миңнеханов йөкләмәсе буенча оператив штаб төзелде, аны Татарстан Премьер-министры Алексей Песошин җитәкли. Аның эшчәнлеге сәүдә предприятиеләрен азык-төлек һәм азык-төлек булмаган товарлар белән тәэмин итүгә, система барлыкка китерүче предприятиеләргә, кече һәм урта эшмәкәрлек вәкилләренә ярдәм итүгә, шулай ук бизнесның банк учреждениеләре белән хезмәттәшлеге мәсьәләләренә бәйле гомуми системалы чаралар эшләүгә юнәлдерелгән. «Без республика икътисадын тотрыклы үстерү буенча чаралар планын расладык. Бүген барлык муниципаль берәмлекләрдә һәм тармак министрлыкларында оператив штаблар булдырылды. Без алар белән даими элемтәдә торабыз. Безнең өчен бизнес һәм эре предприятиеләрдә барлыкка килгән мәсьәләләрне системалаштыру һәм периодлаштыру аеруча мөһим", - дип билгеләп үтте министр. Аның сүзләренә караганда, бүген эшче төркемнең чираттагы утырышы узды, анда импортны алыштыру мәсьәләләре каралды. Утырышта Татарстан Республикасы сәнәгать һәм сәүдә министрлыгы, шулай ук «Татнефтехиминвест-холдинг» вәкилләре катнашты. Ул хәбәр иткәнчә, предприятиеләрдә импортны алыштыру өчен чит ил продукциясенщ аналоглар чыгару мөмкинлекләре каралды. Мидхәт Шаһиәхмәтов хәбәр иткәнчә, ведомствоның иң бурычларыннан берсе – бизнес вәкилләрен дәүләт программаларында катнашуга җәлеп итү. "Илдә гамәлгә ашырыла торган кече һәм урта бизнес өчен барлык ярдәм чараларын да без капиталлаштырдык. Ә килеп туган барлык сорауларны без оператив хәл итәргә тырышабыз. Безнең бурыч - предприятиеләребезне программаларда катнаштыру", - дип тәмамлады ул.