Зеленодольск районының Зур Ключи авылында ирекле янгын күзәтчелеге бинасы ачылды
Тантаналы чарада Россия гадәттән тыш хәлләр министрлыгының ТР буенча Баш идарәсе башлыгы Рафис Хәбибуллин, Зеленодольск районы башлыгы Михаил Афанасьев, ФПСның 8 нче янгын-коткару отряды башлыгы Зөфәр Хәлиуллин, чакырылган кунаклар катнашты.
Яңа ирекле янгын сүндерү күзәтчелеге бинасы муниципаль программа кысаларында төзелгән һәм 2 янгын сүндерү машинасына исәпләнгән. Биредә ике волонтер – Илфат Ибраһимов һәм Рәдиф Шакиров хезмщт куя. Аларның берсе җирле Башкарма комитетта эшли, икенчесе ашыгыч ярдәм машинасы йөртүчесе булып эшли. Төп мәшгульлектән тыш ир-атлар янгын куркынычсызлыгы сагында торачак. Аларга ярдәмгә тагын 20ләп авылдашы килә, алар ут белән көрәшүчеләрнең дус командасының бер өлеше булырга теләк белдергәннәр.
- Ирекле янгын күзәтчелеге бинасын муниципаль программа кысаларында төзедек, район территориясендә елына икешәр шундый объект куярга исәплибез. Шул исәптән Идел аръягы зонасында да, - диде Михаил Афанасьев.
Зур Ключи авылы ирекле янгын сүндерү отрядларын оештыруда «беренче карлыгач» дип санала. Монда команда 2010 елда, ирекле янгын сүндерү күзәтчелеге эшен регламентташтыручы закон барлыкка килгәнче үк оешкан. Символик рәвештә, бүген барлык кирәкле җиһазлар белән җиһазландырылган яңа бинаны ачу нәкъ менә монда узды.
- Безнең волонтерлар саклый торган барлыгы 25 торак пункт бар. Республика күп кенә чаралар үткәрә – Зеленодольск районының Зур Ключи торак пунктында янгын сүндерү күзәтчелег бинасын ачу – бу планлы эш, ул көн саен, ай саен, ел саен үткәрелә, - дип билгеләп үтте Рафис Хәбибуллин.
Зур Ключидә соңгы елда ирекле янгын сүндерүчеләре 25 тапкыр сигнал буенча чыга, 18 тапкыр янгын сүндерүдә катнаша, 7 янгынны янгын сүндерү подразделениеләренең төп көчләре килгәнче мөстәкыйль рәвештә бетерә.
Хәзер команда Зеленодольск янгын-коткару гарнизоны көчләре һәм чаралары исемлегенә керә, шул ук вакытта Зур Ключи җирлеге территориясендә генә түгел, ә 8 меңләп кеше яшәгән якындагы авыллардагы янгыннарга да җавап бирә.