Зеленодольск сайлауларга әзер

Сигезенче сентябрьдә Зеленодольскида Зеленодольск муниципаль районының “Зеленодольск  шәһәре” муниципаль берәмлеге Советына депутатларны өстәмә  сайлау булачак.

– Тавыш бирү ике сайлау участогында узачак, – дип сөйли территориаль сайлау  комиссиясе рәисе Александр Мухин. –  11нче округ буенча  (алты кандидат) – элеккеге суднолар төзелеше техникумы бинасында, 25нче округ буенча  (дүрт кандидат) – Мирный микрорайонындагы балалар сәнгать мәктәбе бинасында.  Тавыш бирү вакыты  – 7дән 20 сәгатькә кадәр.

Сайлау комиссиясе тәҗрибәле җаваплы кешеләрдән  узган ел төзелгән, аларның вәкаләте, яңа законга ярашлы рәвештә,  биш ел дәвамында гамәлдә. Тавыш бирү бюллетеньнәр  әзер –  алар төсле, сак сеткасы да бар.

Тавыш бирү схемасы  стандарт – сайлаучы үзе сайлаган кандидат  файдасына бюллетеньдәге квадратка теләсә нинди тамга куя. Башка вариантлар, мәсәлән, ике кандидат өчен тавыш биргәндә,  бюллетень  гамәлдән чыгарыла, саналмый.
11нче округ буенча – 2795 сайлаучы, 25нче  округ буенча – 2957 сайлаучы.  Иң күп тавыш биргән кандидат җиңүче дип табыла. 

Традиция буенча сайлауда беренче тапкыр катнашучы гражданнарга файдалы  бүләк тапшырылачак.