КНИТУ-КАИ һәм POZIS кадрлар әзерләүдә стратегик хезмәттәшлек турында яңа килешүгә кул куйдылар
Документка POZIS генераль директоры, Россия машина төзүчеләр берлегенең Татарстан төбәк бүлеге рәисе Радик Хәсәнов һәм КНИТУ-КАИ ректоры вазыйфаларын башкаручы Кирилл Охоткин кул куйды.
Килешү фәнни-җитештерү өлкәсендә уртак проектларны һәм машина төзелеше тармагы өчен югары квалификацияле практик юнәлешле белгечләр әзерләү өлкәсендә хезмәттәшлекне үстерүне күздә тота. Яклар КНИТУ-КАИ делегациясенең POZIS компаниясе производствосына эш визиты кысаларында бу мәсьәләләр буенча фикер алыштылар.
"Без җитди теоретик базага ия булган талантлы, мотивацияле яшьләрне җәлеп итү белән кызыксынабыз. КАИны тәмамлаучыларның күбесе, ә алар безнең предприятиедә 270тән артык кеше эшли, үз кыйммәтләрен исбатладылар инде. Яңа килешү иң катлаулы җитештерү бурычларын хәл итәргә әзер булган перспективалы яшь белгечләрне җәлеп итәргә мөмкинлек бирер дип ышанабыз", - дип билгеләп үтте POZIS компаниясе генераль директоры Радик Хәсәнов.
POZIS заводында КНИТУ-КАИ ректоры җитәкчелегендәге делегация логистик үзәк һәм суыткычлар производствосы белән танышты. Кунакларга шулай ук көнкүреш, махсус һәм медицина суыткычларының перспектив үрнәкләре күрсәтелде.