«Бала – төп пассажир»

Хөрмәтле газета укучыларыбыз, уйлаштык та, янәдән бәйге игълан итәргә булдык. Һәм без аны бу юлы автомобиль белән бәйләргә карар иттек. Ник дигәндә, хәзер машинасыз кеше сирәк, бөтен кеше юлда, бөтен кеше ашыга... Юлдагы хәвеф-хәтәрләр саны артканнан-арта бара. Иң аянычлысы – балалар зыян күрә – имгәнә, һәлак була. Балалар махсус креслода гына йөртелергә тиеш булса да, бу кагыйдәне бозучылар күп. Юл хәрәкәте иминлеге дәүләт инспекциясе мәгъ­лүматларына караганда, авариядә гомере өзелгән балалар күп очракта машинага креслосыз утыртылган була. Әлеге бәйгенең төп максаты – юл хәрәкәте, бигрәк тә балалар иминлегенә игътибарны арттыру.
Хөрмәтле газета укучыларыбыз! Электрон адресыбызга автомобилегездә балаларыгыз белән төшкән фотоларыгызны җибәрегез. Фотоларны бары тик 28 мартка кадәр кабул итәбез һәм шул көнне без аларны сайтыбызга эләчәкбез һәм бәяне дә укучыларыбыз бирәчәк. Кем күпме тавыш җыя – шул бәйгебезнең җиңүчесе була.
Бәйгенең спонсоры – ТР Юл хәрәкәте иминлеге буенча фәнни һәм белем бирү программаларын финанслау дирекциясенең Яшел Үзән филиалы.