Муниципаль район территориясендә экология торышына игътибар зур

– Соңгы ике айда, ягъни апрель-майда 15 рейд уздырылып, дистәләгән санкцияләнмәгән чүплек юкка чыгарылды. Кызганычка, бу көнгә әле булса да чүптән арына алмаган җирлекләр бар, – дип йомгак ясый соңгы ясаган рейдларга ТР Экология министрлыгының Яшел Үзән бүлеге җитәкчесе Фәридә Хәмидуллина. – Карамалы Тау бистәсенең Панфилов, Беренче Май, Гайдар һәм К.Маркс урамнары чүпкә батып утыра. Октябрьскийның – Набережная, Ходяшевоның Үзәк урамыннан контейнерлардан чүп түгелсә дә, әйләнә-тирәсе бик чүпле. Айдар, Күгеш, Күгәй, Олы Шырдан авылы җирлекләрендә дә чүп проблемасы ахырына кадәр хәл ителмәгән. Шәһәрнең Гәр һәм Мичурин урамнарында чүп-чар күп. Бакчачылык җәмгыятьләрендә бу тема җәен аеруча актуальләшә. Аны хәл итүнең юлын эзләргә туры киләчәк.
Ике айга сузылган чистарыну тәмамланды да, эш бетте дигән сүз түгел бу. Чүп-чарның аның бервакытта да беткәне юк. Шуңа күрә яшәүчеләрнең дә, җаваплы хезмәтләрнең дә чиста яшәүгә омтылышлары булу кирәк. Яшел Үзәнебездә исеменә җисеме туры килерлек итеп яшәргә кирәк.