Яшел Үзән журналистлары агач утыртты. Син дә кушыл!

Тирә-юнебезне үзебез чистартмасак, матурламасак, безнең өчен беркем дә килеп эшләмәс. Кемдер тиеш дигән сүзне онытып, читтән ярдәм көтмичә генә эшкә үзебез алыныр вакыт.

Шушы көннәрдә «Җиңү урманы» акциясендә журналистлар да катнашты. Ленин урамында бер төркем егет-кызлар телевидение бинасы каршында 156 төп куак утыртты. Бу изге эштә район башлыгы Александр Тыгин да катнаш­ты.
– Иң мөһиме – теләк булсын. Йорт ишегалдында кемдер килеп агач утырт­канны көтәргә кирәкми, ә бу мәсьәләне йортта яшәүчеләр белән җыелып бергә хәл итәргә мөмкин. Бүген журналистлар кулына көрәк алды һәм бу башкаларга да үрнәк булсын иде, – ди Александр Тыгин.
Чынлап та, шәһәр һәм авылны яшелләндерү, ямьләндерү өчен зур акчалар соралмый. Иң мөһиме – теләк һәм күп фатирлы йортта яшәүчеләрнең бер уйда булуы гына кирәк. Аның өчен күршеләрең белән җыелып, агачны кайда утыртсаң кулайрак була, дигән фикерне уртага салып хәл итү, карар чыгару гына мөһим. Агач һәм куак үсентеләрен 4-17-45, 4-25-36 номерларына шалтыратып бушлай алырга була.
Мондый мөмкинлекне кулдан ычкындырмагыз, журналистлар үрнәк күрсәтте, син дә кушыл!