Зеленодольск районы мәктәпләрендә Белем көнен каршылыйлар!
1 сентябрьдә укучылар ата - аналар белән берлектә көзнең иң мөһим бәйрәмен - Белем көнен каршылыйлар. Зеленодольск шәһәренең Ломоносов исемендәге 18 нче күппрофильле лицее укучылары өчен бүген икеләтә бәйрәм, чөнки биредә беренче тапкыр кыңгырау яңгырады. Балаларны бәйрәм белән шәһәр мэры Михаил Афанасьев котлады.
- Кадерле укучылар, укытучылар, ата-аналар! Сезне Белем көне белән котлыйм! Зеленодольск районында 18 меңнән артык мәктәп укучысы бар, шуларның 2236 сы - беренче сыйныф укучысы, 258 е-яңа лицейда белем алачак Сезгә, беренче чиратта, нык сәламәтлек, тырышлык, хезмәт сөючәнлек телим, һәр көн яңа белемнәр һәм күнекмәләр белән тулып торсын! Бәйрәм белән! – дип үзенең теләкләрен белдерде мэр.
Тантаналы линейкадан соң укучыларны сыйныфларга озаттылар. Алда аларны иҗади дәресләр, күңелле үзгәрешләр, мәктәп тормышының онытылмас көннәре көтә. Хәерле юлга!