Татарстан Росреестры бизнес вәкилләре арасында сораштыру үткәрде
Респондентларның күбесе ведомствога максималь балл куйды
Татарстан Республикасы буенча Росреестр идарәсе күчемсез милек өлкәсендә хезмәт күрсәтү сыйфаты турында чираттагы сораштыру үткәрде. Шәхси эшмәкәрләргә һәм юридик затларга 5 баллы шкала буенча документларны кабул итү шартларын һәм сыйфатын, теркәлү тизлеген, күчемсез милекне электрон рәвештә рәсмиләштерү мөмкинлеген һ.б. бәяләргә тәкъдим ителде. нәтиҗәдә респондентларның күбесе Татарстан Росреестрына максималь балл куйды.
«Бизнес-бергәлек вәкилләреннән сораштырулар безнең ведомство тарафыннан даими уздырыла, кече һәм урта эшмәкәрлек субъектлары белән хезмәттәшлек иткәндә җитешсезлекләрне ачыкларга, Росреестрның дәүләт хезмәтләрен күрсәтү процессын оптимальләштерергә һәм вакытын кыскартырга ярдәм итә», - дип билгеләде күчемсез милекне дәүләт теркәве бүлеге башлыгы урынбасары Энҗе Мөхәммәтгалиева.
Шулай ук Татарстан Росреестрында искәртүләренчә, быелның 1 мартыннан юридик затлар кадастр исәбенә һәм хокукларны теркәүгә гаризаларны аларга беркетелгән документлар белән бергә бары тик электрон формада гына бирергә тиеш. Әлеге таләпне үтәмәү документларны караусыз кире кайтаруга китерә.