POZIS һәм Яшел Үзән механика көллияте хезмәттәшлекнең алдагы векторларын билгеләделәр
ПОЗиС һәм ЗМК чираттагы уртак техник-педагогик совет үткәрделәр. Конструктив диалог барышында стратегик партнерлар уртак эшкә йомгак ясадылар һәм мәгариф кластеры программасы кысаларында үсешнең перспектив юнәлешләрен билгеләделәр. Фикер алышу уку йорты базасында узды.
Очрашуның төп темасы Яңа өстенлекле белем бирү программаларын эшләтеп җибәрү һәм көллиятнең матди-техник базасын яхшырту планын карау булды. Студентларга бер үк вакытта аудиторияләрдә теоретик белем һәм турыдан-туры производствода практик күнекмәләр алырга мөмкинлек бирә торган белем бирүнең дуаль системасын үстерүгә аерым игътибар бирелде. Шулай ук сәнәгать лабораторияләре һәм көллиятнең уку аудиторияләре өчен өстәмә корпус төзү мәсьәләсе буенча фикер алыштылар.
Утырышта конкрет инициативаларның берсе буларак, заводның югары квалификацияле белгечләрен көллияттә дәресләр үткәрүгә активрак җәлеп итү тәкъдим ителде, бу исә актуаль җитештерү тәҗрибәсен белем бирү процессына тагын да тыгызрак интеграцияләргә мөмкинлек бирәчәк.
«ПОЗиС» компаниясе генераль директоры, Россия Союзмашының Татарстан төбәк бүлеге рәисе Радик Хәсәнов сыйфатлы техник белем бирүнең мөһимлеген ассызыклады: «булачак белгечләр теорияне генә белеп калмыйча, укыту процессында ук хезмәт эшчәнлегенә кушылып, реаль гамәли күнекмәләр дә алсын өчен, барлык уку һәм җитештерү ресурсларын файдаланырга кирәк».
Визит кысаларында генераль директор җитәкчелегендәге POZIS делегациясе технологик процессларны автоматлаштыру лабораторияләрендә булып, көллиятнең уку базасы белән танышты һәм ЧПУ белән заманча станокларның югары йөкләнешен билгеләп үтте. Шулай ук компания җитәкчесе укучылар белән аралашты. Студентлар, үз чиратында, тәҗрибәдән алган тәэсирләре белән уртаклаштылар һәм теләкләрен җиткерделәр.