Яшел Үзән Хезмәт даны шәһәре исеменә тулысынча лаек

Яшел Үзән муниципаль район һәм шәһәр Советларының берләштерелгән Совет сессиясендә дә нәкъ шулай булды. Икенче чакырылыш депутатларының соңгы сессиясенең көн тәртибендә бер генә мәсьәлә тикшерелде – шәһәргә Татарстан Республикасының Хезмәт даны шәһәре статусына тәкъдим итү турында.
Бөек Җиңүнең 70 еллыгына әзерлек көннәрендә ветераннар Советы активы әлеге статусны бирү турында район хакимиятенә мөрәҗәгать итә. Анда норматив базаны өйрәнгәч, шул мәгълүм була: субъект дәрәҗәсендә бу эш мөмкин, әмма инициатива җирлектән чыгарга тиеш. Район ветераннар Советы утырышында да карала бу мәсьәлә. Хәтерләсәгез, ул массакүләм мәгълүмат чараларында да актив тикшерелде. Патриотизм, туган төбәгебезне ярату яшел үзәнлеләр өчен бүген дә бик мөһим тема булып чыкты. Ветераннар Советына предприятиеләрнең хезмәт коллективларыннан бик күп мөрәҗәгатьләр килә башлады.
31 августта шәһәргә Татарстан Рес­публикасы Президенты вазифаларын вакытлыча башкаручы Рөстәм Миңнеханов килгәч, район башлыгы Александр Тыгин бу турыда аңа да җиткерде.
– Әмма бу бары тик беренче этап кына булырга тиеш. Бәлки, республикада хуҗалык итүче субъектлары, хакимият органнары арасында ярышларны кире кайтарырга, ә җиңүчегә күчмә байрак тапшырырга һәм «Хезмәт фидакарьлеге өчен» медале белән бүләкләргәдер. Дәүләтебездә булган барлык яхшы нәрсәләрне кайтарырга кирәк, минемчә, – диде сессиядәге чыгышында район башлыгы Александр Тыгин.
Районыбызның республикабыз һәм илебез үсешенә керткән өлеше турында бик күп язарга булыр иде. Сессиядә бу турыда ТР Дәүләт Советы депутаты, А.М.Горький исемендәге Яшел Үзән заводының генераль директоры Ренат Мистахов, Серго исемендәге заводның профсоюз лидеры Равил Сибагатуллин, депутат Геннадий Тихонов һәм башкалар сөйләде. Мин, укучыларыбызга кызыклы булыр дип, кайбер саннарны гына китерәм.
Бөек Ватан сугышына 34 мең яшел үзәнле алына, шуларның 13 меңе яу кырында башын сала.